... موّال
أَلْمَنْ أنْقل أجداماتي بالعيد
وياهو الّي أكُلّه عيدك أمْبارك
لايمّي هَلي لاأخْتي لاخوي
ولامِنْ دكِ بابي وّكال شخبارك
غريبة الدار والأحوال والناس
ولا يمّك محب تشكيله نارك
ولو تحترك ما تلكى الْ يطفّيك
اذا ما تعرف انت أسم جارك
أعيش أبْغُرْبِتي وَيْ وَحْشَةالروح
صابُرْمُحْتَسِبْ يا رب على أقدارك
عسى يوم الوطن يتْعافى وِنْعود
وأكون أول محب واكف على اسوارك .

المذهب
ماكومنّك ياعراقي...ياشهم يَبْن الأصول
أنتَ قانون أشِتِياقي ... يا وَرِد كل الفصول
**
ماكومنكّ وِبْصِفاتك
غيرك ويِحْلِب أبْشاتَك
ماشِفِتْ راحه أبْحياتك
الغربة بِدْيارك أتْجول
ماكومنّك ياعراقي ياشهم يَبْن الأصول
**
انت شارب غيرَةْأهْلَكْ
دوم شامخ وَلَوْتِهْلَك
اصبرعلاالصبرمهلك
وياصَبُرْ ابن البتول
ماكومنّك ياعراقي ياشهم يبن الأصول
**
انت لاشيعي ولاسنّي
آنه منّك وانت مِنّي
ماعْرَفِتْ يوم التَجَنّي
وهذاطَبْعَكْ ياخَجول
ماكومنك ياعراقي ياشهم يبن الاصول
**
ماشِفِتْ آنَه أبْحنانك
ومَنْوِجَدْحَي أبْزمانَك
الطيب والغيره عِنْوانك
وخيردايم لايَزول
ماكومنك ياعراقي ياشهم يبن الاصول
**
انتَ كُلَّكْ كِبْرياء
وتُرْفُضْ أنتَ الأوْصِياء
كبيسه تِسْأل كَرْبلاء
تِقْبَلْ بّهاي الحِلول
ماكومنك ياعراقي ياشهم يابن الاصول
**
وانتَ ياإبْن الشِمال
آنَه خَيّك لامُحال
إطْلُبْ الوِدْ والوصال
لايفرّقْنا عَذول
ماكومنك ياعراقي ياشهم يبن الاصول
**
وإنت ياإبن الرمادي
طيبك المَعْهود زادي
هاك شاجوري وّعِتادي
شِدّةبأذن الله تِزول
ماكومنك ياعراقي ياشهم يبن الاصول
**
وإنت ياإبن الجنوب
لاتِصَدّك كل كَذوب
حاقِدْوحاكِمْ لَعوب
فاق بأجرامه المَغول
ماكومنك ياعراقي ياشهم يبن الاصول
**
هذاطَبْعك ياعراقي
للمَكارِمْ إنتَ ساقي
عالعَهَد خلّيك باقي
مَوطِنَك وأنتَ مَسْؤول
ماكومنك ياعراقي...يا شهم يبن الأصول
.......