لا تظن عافوك الزلم
 واحلامك الضاعت
 حلم ..
 يا موطني .. يتبع حلم
 شحت رسومك
 يا وطن
 ما بيها ظل شي
 ينرسم
 باعوك تجار الحرب
 باعوك خردة للعجم
 جرحك تره بگلبی
 يحز ..
 بس آني أكتم بالألم
 آني ادري بيك تمرمرت
 وشعبك تهجر ..
 وانقتل ..
 وشوفوك أنواع الظلم
 أقزام ذولة يا وطن
 محد تره منهم سلم
 لا كاع .. لا مي .. لا نخل
 والأخضر تحول فحم
 لا سياسيهم عدل ..
 ولا برلمانيهم شهم
 ما بيهم أي واحد وفي
 أنجاس تارسهم لؤم
 شعب العراق شكد وفي
 وبيهم بدا يرجم رجم
 ناس تظاهر يا وطن
 واستشهدوا عدنه قمم
 وناس .. فضحوهم فضح
 بكل حلقة سووهم فلم
 أسماءهم صارت مزق
 وما ظل عراقي ما فهم
 ساحاتنا بيها الفخر
 وارجالنا عدهم عزم
 شعب الأصالة موطني
 حالف على أمر الحسم
 أبطالنا عز للوطن
 محروس وبزود الزلم
 دكت انذار وداعتك
 باجر نظل بيهم نلم
 باجر نظل بيهم نلم