موّال ... مرّيت
جثير من العواصم آنه مرّيت
مثل طيب العراقي ابد ماريت
نفرح لو لفانه الضيف مرّات
ونحط حط السحاب على الوطيّة
ماكو منّك يا عراقي يا شهم يا بن الأصول
انت قانون اشتياقي يا ورد كل الفصول

****************************

ماكو منّك وبصفاتك
غيرك ويحلب بشاتك
ماشفت راحة بحياتك
الغربة بديارك أتْجول يا شهم يا بن الأصول

***************************

انت شارب غيرت أهلك
دوم شامخ ولو تهلك
أصبر على الصبر مهلك
ويا صبرابن البتول يا شهم يا بن الأصول

**************************
انت لا شيعي ولا سنّي
آنه منّك وانت مني
مَعْرفتْ يوم التجنّي
وهذا طبعك يا خجول يا شهم يا بن الأصول

*****************************
ما شفت آنه بحنانك
ومنْوجدْ حي بزمانك
الطيب والغيرة عنوانك
وخير دايم لا يزول يا شهم يابْن الأصول

***********************

انت كُلّك كبرياء
وترفض انت الأوصياء
كبيسة تسأل كربلاء
تقبل بهاي الحلول يا شهم يابْن الأصول

*************************
وانت يا أبن الشمال
آنه خيّك لا محال
اطلب الوِدّ واتّصال
لا يفركّنا عذول يا شهم يابْن الأصول

*************************

وانت يا ابن الرمادي
طيبك المعهود زادي
هاك شاجوري وعتادي
شدّة بأذن الله تزول يا شهم يابْن الأصول

*************************
وأنت يا أبن الجنوب
لا تصدك كل كذوب
حاقد وحاكم لعوب
فاق باجرامه المغول يا شهم يابْن الأصول

************************
هذا طبعك يا عراقي
للمكارم انت ساقي
عالعهد خلّيك باقي
موطنك وأنت مسؤول يا شهم يابْن الأصول