بما أن الأسئلة هواي والأجوبة شحيحة مثل الماي في قطاع 56 في مدينة الثورة المباركة ، وشنهي الفايدة من الأسئلة أذا كان آذان (المسعولين) في الحكومة المالكية آذن من طين وآذن من عجين

1- على ذكر العجين أكيد شفتو تدهور مستوى الطحين في الأسواق العراقية هاي الأيام خاصة بعد توقيع وزارة التجارة اتفاقية طويلة الأمد مع مصانع (فييت بلاك) الأمريكية لتوريد الطحين الدرجة الخامسة للشعب العراقي الصابر من دول ما نعرف حتى أماكنها على الخارطة ، وحسب القاعدة التجارية (لفليح السوداني ) التي تنطلق من التساؤل البريء التالي إذا كانت الخضار والفاكهة تفيد في تخفيف الوزن ، فلماذا لم يستفد الفيل منها ؟ ، يعني فليح كل الدنيه تعرف ان الشعب الأمريكي اكبر مستهلك للطحين وكما تعرف أنهم ما عدهم حصة تموينية اشو ظليت أدور على اسم هاي الشركة (فييت بلاك) الى ما تعبت عيوني ما لكيت شركة بهذا الاسم بويه ما تكلي من وين جيتها علينه من دهر الطرك يا خايس

2- ولان القاعدة الرياضية تقول اذا كنت تركض للأمام لتخفيض وزنك فاكيد لو ركضت للوراء سيزيد وزنك فالسوداني سود الله وجهه بالدنيا كبل الآخرة يقول (نحن مقتنعون بأن للكويت الأولوية في دخول السوق العراقية لاعتبارات عدة أبرزها قربها الجغرافي من العراق والروابط التاريخية بين البلدين والشعبين) ولك والله انت واحد مطفي وتقره التاريخ مثل ما واحد يريد يرجع الكيلوات الناقصة من وزنه بالركض الى الوراء

3- سؤال دائما يردده مام جلال على مستشاره السامرائي يكوله : كاكا سامرائي إشارة ممنوع المشي على الحشيش المزروع شلون خلوها بمكانها ؟؟ فجاوبه السامرائي بكل عفويه واريحية سيداة الرئيس خلوها وبعدين زرعوا الحشيش ، طبعا السيد الرئيس ومستشاره اثنين نعاج بلا كبش لان بوش الكبش مختفي جراء استهدافه من قبل القنادر شديدة الانشطار الله يفك أسرك أخوية منتظر

4- ولان من اغرب العجائب بحسب المالكي تتمحور في سؤال تاريخي وزراعي وجغرافي يقول ، البطيخة الي مابيهه بذور شلون زرعوها ؟ خويه شنهي اتسودنت لعد جيب الليف وودي الليف وعدمت الزلمة وهسه جاي تصالح ،بويييه شكد قشمر انته ، المهم باجر يصيح الديج وتبيض الدجاجات ؟!

5- ولتجنب فقدان المزيد من البزازيين بعد انقراض الفئران حسب قاعدة الفئران اول الهاربين من السفينة الغارقة لماذا تقوم وزارة التكنولوجيا بابتكار طعام للقطط بنكهة الفئران ؟

6- واكو سوالف تبط الجبد يا جماعة مثل سوالف ذاك الاثول ابن الاثول اخو الاثول ابو الاثول عزوز المسرطن الذي كان ولا يزال شعلة فرقة لا تهدء حتى انه تقدم بطلب الى الامم المتحدة بطلب فلسفي مفاده : لماذا يعقمون الإبرة السامة لقتل المحكوم عليهم بالإعدام ؟؟؟؟ شكد مسموم وحفيد مسموميين ، بل انه تقدم بسؤال إلى الحكومة اليابانية يوضح فيها استغرابه لماذا كان الطيارون الانتحاريون اليابانيون ( الكاميكاز ) يرتدون خوذة واقية ؟؟؟ شكد مطفي وقشمر وطايح حظ ليش الي يضرب دريل يخلي واقية على اذانه علمود ما يسمع اصوات ضحاياه ام لتجنب صوت الدريل ؟

7- اذا كان العراق ياهو اليجي يدخله وياهو اليجي يسوي بيه ميلشيات وتفجيرات واغتيالات فليش نخلي حرس حدود ونسوي جيش وشرطة هم شلون شرطة (برياني) لان القاعدة الامنية التي وضع قواعدها موفق الربيعي تقول : إذا كان السوبر ماركت يفتح لمدة أربعا وعشرين ساعة في اليوم لمدة عامٍ كامل ، فلماذا وضعت عليه الأبواب والأقفال؟؟ خوب هذا حرماي ويعرف شغلته ومستشار بعد شنهي تريدون اكثر بويه ؟

في الختام تقبلوا دعواتي الصادقة بان يترفق بكم الشعب المسكين أثناء سحلكم القريب ان شاء الله