سبق وان اطلقوا الثوار في ساحات العز والتحرير ومنذ أندلاع ثورتهم في الأول من تشرين الأول ٢٠١٩ أنه لامساومة على تحرير العراق وطرد المحتل والغازي ومحاسبة الفاسدين والسراق والغادرين بشعب العراق الابي ، واليوم .. وغداً .. وبعد غد ، سيطلقون مجدداً الثوار الأصلاء ، وبعد استقالة المجرم رئيس الوزراء الفاشل عادل عبد المهدي والى يومنا هذا كلفوا ثلاث لحد الآن وكانوا بالتسلسل هم علاوي والزرفي وأخيراً جاء الكاظمي ليختم بمسرحية هزلية لعبة الحية والدرج ليتسلق السلم الى رئاسة الوزراء ، واعادوا الأبطال المرابضين في ساحات العز رفضهم لهذا المرشح الجديد الذي لايعرف أحد وحتى الراسخون بالعلم انه كيف أصبح عليه التوافق شيعي سني كردي ايراني .. امريكي ، وكأن العراق سلعة تباع وتشترى في اسواق النخاسة ، ولأخير مرشح هتفوا الابطال للاكاظمي .. مرفوض .. مرفوض .. مرفوض.
هذا العناد والاصرار من الكتل على هذا التوافق يكون بين طياته ( انه ) او حسبه مفبركة ، وهذه اللعبة والصفقة بين اعداء الامس أصدقاء اليوم تمت الطبخة ، حيث ذكرتني هذه الفعلة في قصة تروى أنه كان في قديم الزمان أسد قال لزوجته ( يا مره احنه لازم انخلف ويصير عدنه ولد حتى نحافظ على الغابة ويصير أبني بالوراثة الملك من بعدي ) وبعد فترة ما كذبت زوجة الاسد جابت زوجة الأسد لكن الغريب بالأمر ان المولود الصغير طلع لونه مخطط ويشبه النمر .. ! ! الاسد ابو خميس استغرب من الأمر ، واخذ الشك القاتل يغزو قلب الاسد وسأل زوجته كلها ولج شو هذا ابني يشبه النمر، وهنا أنتفضت الزوجة وقالت للاسد زوجها ( أحترم نفسك ولا يروح بالك بعيد ترى شرفي خط احمر.سكت الأسد شيسوي المسكين ما عنده دليل دامغ على زوجته وكال انتظر موسم التزاوج القادم بلكي يصير عندي ولد ويكون يشبهني.
وفعلا حبلت زوجة الاسد وجابت مولود ، والعجيب بالأمر أن المولود الجديد طلع منقط ويشبه الفهد.الأسد باوع على زوجته باستغراب واجابته بكل صلافة ( كلشي ولا تتهمني بالخيانة يا عزيزي ملك الغابة ترى أجيبلك النزاهة يا ما تستحي حتى تاخذ جزاك وانت تعلم ماذا تفعل النزاهة ).المهم سكت المسكين الاسد لانه لا يملك الدليل القاطع بان زوجته تخونه وقال سانتظر موسم التزاوج القادم.واجت ايام وراحت ايام .. ، ويوم من الايام الاسد طلع للغابة وبنص الطريق تذكر انه من طلع من البيت ما باس زوجته وهو المعتاد على ذلك ، وعند عودته للبيت لما وصل الى البيت لكه الكارثة في أنتظاره لكون المطي عنده بالبيت ، كله ها ولك يا مطي شسوي أبيتي ؟ كله المطي يا حضرة الملك لا يروح بالك بعيد ترى اني والنمر والفهد مشتركين بسلفة ويه مرتك، واليوم أجيت أسدد السلفة.
الأسد صارت عيونه بكصته وراح لزوجته وكلها ولج تسوين سلفة انتي والنمر والفهد والمطي وما تسجلون اسمي وياكم ؟ روحي اني زعلان عليج ، كلتله زوجته لا تزعل حبيبي ترى اذا زعلت انه راح اضوج، واذا ضجت أحتمال البيبي اللي ببطني يطلع يشبه المطي .. ! ! رابط السالفة هو الحكومة الثالثة تكلف بعد عادل زوية وتفشل شلون راح يستقر البلد العراق الجريح ومتى يولد لنا رجال من ظهر أزلمه فحل وشوكت مرت الأسد اتجيب أسد بحق وحقيقة ويحافظ على العراق الذي أصبح من خلال هؤلاء الحيوانات محشومين شليلة وضايع راسها.
ومتى يأتي للعراق أزلمة أخو خيته لو هم هذا حظ العراق العاثر سوف يجينه مطي أجلكم الله ويشلش الأمة وراح يضيع العراق من ايدينه مجدداً.
