ما ندري شنو الموضوع وشنو القصة !؟.. وليش مطلوب القبض على  "علي"  السوداني ..

أشو , فجأة , الشرطة الأردنيّه  كلمن منهم حاط ثوبه بسِنّه  يهمرع بدرابين الأردن يدوّر عله السوداني !؟

يعني هل السوداني إله علاقة بشحة الحصّة التموينيّة مثلاً !..

هل السوداني من القاعدة

هل له علاقة بتفجيرات الأردن

هل السوداني طلع , وره عشريييييييييييين سنه عله رأي حسين رياض ألله يرحمه , طلع ابن عمّة الخياطة اللي خيطت بدلة التفجيرات اللي جانت لابستهه  "الانتحارية" العراقية ساجدة الريشاوي اللي  "فجرت"  فندق الأردن

هل هو قائد تفجيرات الأربعاء

هل هوّه العقل المدبّر وراء جميع أيّام العراق الدمويّة  زمن خطّة فرض القانون المحترمة ؟

يجوز هوّه اللي خطّط السرقة مصرف الزويّة ؟

مجزرة صاغة البيّاع يمكن هوّه اللي سوأهه ؟

مصرف النجف ! ..

يجوز هوّه اللي وره تأخر تشكيل الحكومة الموقّرة  ..

ممكن هوّه علي السوداني واكف حجر عثرة بطريق تنفيذ  المثل العراقي المعروف اللي يكول ؛ يروح جلب أبيض يجي جلب أسود .. ؟

هل  للسوداني علاقة بعمل القنابل اليدوية  "يلكلكهه"  بالمطعم إللي يشتغلل بي بعمّان على أساس أنّها "فلافل" !

 هل كتابات علي السوداني رسائل مشفّرة يحرّك بها  "الأرهابيين" في العراق عن بُعد ! ... لعد هذوله شلون إرهابيين مثقفين بحيث يفهمون شيريد منهم علاّوي الوردة الشاهد الحيّ المعايش لخطّة فرض مطاردة الكلمة الحرّة ! ..

اذا الارهابيين بهالدرجة العالية من المرونة الفكريّة وما يعانون من أي إسهال فكري  وبإمكانهم  ينطوهه  وره مياخذوهه ! لعد آني أنتخبهم أوّل واحد .. لأن يفتهمون شيريد منهم ضمير العراق علي السوداني .. !

وإذا جان الإرهابي هيجي مثقف فآني من هسّه أعلنهه عله رؤوس الأشهاد ؛ آني أريد اصير مثقف ! ..

ويعني بهالحالة  تكون كتابات السوادني ذات جُمل ذكيّة ! .. وعابرة ! ..

أو يجوز .. ومن المحتمل يكون السوداني مطلوب اللجنة المسائلة والعدالة بعد أن قدّم بيهه كشف لللجنة الموقّرة مدير إعلام السياحة الطالقاني يطالب السوداني بحساب قديم  متكوّن من تلث نفرات جلاوي وسبع بطاله بيره لؤلؤة وماعون زلاطة  نوع فاضل خليل "كلب" بحسابهن أبو حسين من نادي المصوّرين بالوزيريّة  قبل سطّعش سنة ؟ ..

أو متورّط بقضيّة اتخص السودان ..

أو تخص جون كرن ..

أو شافوا شكله العلي من "السود" عبالهم من الهنود , وميدرون الماينطوهه الشمس حاركه وجهه للسوداني حرك ؟

وإلاّ .. إلويش يعني السوداني بالذات يعني ... ؟! .. هل هو ايضاً من الأزلام ! .. والله ما سمعت أو قريت من عنده ولو كلمة وحده يجيب بيهه طاري الحكومة السابقة .. بالعكس جان يغمز ويلمّز بيهه .. ! أصلاً بالعكس , جان يديور بجيبه ديلاب الهوه من شدّة الافلاس اللي جان يعاني منه بالعراق ! وخاصّة من يصير المغرب وتبدي ضويات نادي التشكيليين والمصورين والاعلام ونادي الشطرنج يكومن يشتعلن وينطفن ! , تشوف علي السوداني واكف يم عربانة اللبلبي كبال كليّة التربية الفنّيّة بمنطقة االكسرة رايح جاي مثل ماي الحـقـ... عبالك دا ايدوّرله عله موضوع بدماغه  حتينه يكدر يعبر بي منطقة الخطر الترويضي اللي جنّه نعاني منهه آني وياه  وبقيّة الربع  والممتدّه ما بين المغرب والفجر  !

زين لعد يجوز أكو نوع من التفلات ... عفون .. أقصد ؛ يجوز أكو  نوع من التفاهمات بين حكومة المنطقة الخضراء والحكومة الهنديّة اعترضت بيهه الهند الشفيقة على لحية رفيك علي السوداني باعتبارهه ماركة سيخيّة  مسجّلة وميجوز تقليدهه ؟ ..

هل السوداني جان عضو فلكه بالساحه الهاشميّه ؟

أو .. من المحتمل يعني .. يجوز  العمالة الهنديّة والبنغلاديشيّة اللي تشتغل بالعراق علمود  يلحكون عله حملة الاعمار والازدهار اللي دَتوِنّ  وَنّ  بالعراق ومحّد ديلحّك عله سرعاتهه العاليه كللش , طالبوا بالسوداني بعد ما شافوه بالصدفة  عله قناة لشرقيّة عبالهم  إمامهم  المعمّم اللي هرّبهم  من الهند للعراق وشفط فلوسهم ! ..

احتمال ؟ .. يعني احتمال .. يكون هوّه اللي ورّط الحكومة العراقيّة بصفقة  "الصديق"  إبن القوات الصديقة جيم ماكورنيك ولبّسهه براس ولد الخايبه اللي راحوا بعشرات الآلاف بين قتيل وجريح من وره جهاز يعمل بالشبخات والجلاليق ..!

يعني ممكن يكون السوداني مطلوب للخدمة العسكريّة مثلاً ..!

يجوز دعوا مواليده علمود خدمة الاحتياط لاسترجاع الفكّه وأم الرصاص وأراضي البرزاني بشمال العراق بعد ما شبعت دكّ ,وهوّه ميدري , أو يدري بس مثوّلهه ! ؟ ..

يعني والله ما  أدري !؟ ..

 يعني قابل هذه اللي أصدر قرار الترحيل راد  من علي السوداني بخشيش إشجمّ  "حبّة" فلافل وعلاّوي مَقِبل ؟ ...

أو هذه اللي كاعد اببغداد وعملهه بالسوداني  .. يجوز راد يطمطم  ويلهّي كتّاب المواقع وشبكات الأنترنت عن فضيحة وكيل السيّد السستاني قدّس الله سرّهما  أو يشتت كثافتهه  على أقل تقدير , فكاللك ؛ .. وين أذبهه .. وين أذبهه يمحفوظ السلامه والبكه  وين أذبهه ؟؟ .. براسمن أذبهه ؟ أشو مبقه أحّد مهم من الاعلاميين والكتّاب  بدول الجواريب  "الإرهابيّة"  كلهم شلعوا للسويد وألمانيه  والصومال والنرويج وبروناي والعراق وفنلنده  ... وماكو غير علاّوي أذبهه براسه .. تطبيقاً للمثل السيخي اللي يكول ؛ ذبهه براس سوداني ولا تمشي حافي يم تنزاني!! ..

يعني حظّ أبو حسين  هنا هم معثّر مو بس بالعراق , ليهسّه  خطيّه ما طلع إسمه للترحيل الأميركه !... وآني همّينه أستغل هاي المناسبة وأكلّه الأبو حسين أبالك أبالك اتروح الأميركه .. روح الكندا أسترلك وأونسلك علاّوي .. أقللها تلاكي بنار جهنــّ.. العفو أقصد بكنده مزاحم الناصري وعلي تفكه  ومشتاق وسلام جعاز وبلال أبو الطرب  وبقيّة الشلّة الوكيحه , وراح تلكيهم هذولاك همّه همّه عله حطّت إيدك من شفتهم آخر مرّة بعمّان ؛ من يصير المغرب يكومون يشتعلون وينطفون من كيفهم  ههههه ..

أو احتمال  جانت أكو صفقة بين الاردن والمنطقة الخضراء .. سلّم بلّم .., تنطونه لو ننطيكم .. ما قبلتوا تنطونه رغد .. إنطونه  السوداني , ولا تفشلونه كدّام قاسم عطه !..

وإذا كل هاذي الاحتمالات كلهه بعيدة عن الواقع , فهل من المحتمل توجد خطّة جديدة الأبو إسراء الوردة  مرادفة الخطّة فرض القانون إسمهه  "خطّة اعتقال الباقون" ! ..

لعد بهيجي حالة ماكو غير أكو شريط جديد ناوين الجماعه الماينطوهه لو تطلع براس العراق نخله , يكومون يدورون هذه الشريط براس العراقيين .. راح السوداني اجه السوداني  .. قبظنه عله أبو عمر السوداني .. طلع مو هوّه .. لزمنه ابو مصعب الزرقاني .. طلع أبو حفصة التلمساني وإلى أن تجي الانتخابات القادمة وره أربع سنين لُخ ينطحن لاخ , يبقون هذوله نفسهم ويّه شعب العراق المصخّم الملطّم , بعدهه يعلن سعادة سفير العراق الأسبق بسورية أبو إسراء عن مقتل  "مو اعتقال!"  أبو عمر السوداني ... وأبوكم الله يرحمه ويرحم أبونه ...

ودور بينه وبالعراقيين يا عشك دوّيره ...